esun pu.txt

jan Sonja li kama jo e mani pi mute seme tan esun pu? esun Amason la, jan 200 li toki e pilin ona. (nanpa lon li 201, taso mi wile e nanpa pona.) jan li esun ala la, ona li ken ala toki. ni la, jan 200 en jan namako li esun. nasin pu tu li lon: lipu lon en ilo. pu lipu li wile e mani Mewika 16, taso pu ilo li wile e mani 10.5 taso. jan ale li esun e pu ilo la, ona ale li pana e mani 10.5 pi mute 200, e mani 2100. (esun Amason li lanpan e wan pi mani ni, taso mi pali ala e ni tan ni: jan mute li esun e pu li pana e mani li toki ala e pilin.) ma Mewika la, jan li kama jo e mani ni tan pali lon tenpo mun wan anu tenpo lili. taso ma Posuka mi la, jan pi kama jo mani lili o pali lon tenpo mun tu wan. ma ante la, ni li ken ante mute. ale la, ni li mani suli, taso ona li suli mute ala.
ken la pu o esun ala lon tenpo ni? ken la jan Sonja o pana e ona kepeken mani ala. kin la, jan li wile pali lawa ala la, ona li ken lanpan e pu ilo kepeken mani ala. pu li ijo sona nanpa wan pi toki pona. ni la, ona o esun ala. taso jan Sonja li pali suli e toki pona, li wile e mani tan ona. wan mute pu li esun ala: sitelen pona en lipu nimi en open pu. "ijo sona nanpa wan" la, jan Sonja li wile ala e ni. pu li pana e nasin pi jan Sonja taso, e nasin nanpa wan ala. lipu sona ante mute pi toki pona li lon, li esun ala.
ken la esun pu li ike ala. taso ona li lon esun la, ona o lon esun Amason taso ala, tan ni: esun Amason li pali e ike mute tawa ma, tawa lawa, tawa jan pali ona. jan Sonja kin li pilin e ni, li wile e esun ante. mi la, esun Itusu Ajo li ken pona tawa esun pi pu ilo, tan ni: kulupu pi lipu pi esun ala li ken lon. ni la, jan Sonja li ken awen kama jo e mani, taso jan pi mani ala li ken awen kama jo e pu. kin la, nasin ni li ken li lon ijo esun mute: jan li esun e pu la, pu namako li kama lon kulupu pi esun ala. ni la, jan li esun la, ona li ken pilin pona tan pana.
ken la pu nanpa tu li kama lon tenpo kama. mi sona e pali ni taso pi jan Sonja: ona li alasa e ike pu, li pali e kulupu pi pona ona. nimi "ma Sawusi" li lon pu, li ike tawa nasin kalama pi toki pona. jan Sonja li pana e sona ni lon kulupu, li toki e ni: o kepeken "ma Sajusi". taso ni li pu nanpa tu ala. ken la, pu nanpa tu la, lipu nimi la, lipu walo li lon, li toki e ni: "o pana e nimi sin pi wile sina!". (nimi sin li pona tawa jan Sonja.)
poka la: lipu wan pu nanpa 62 li toki e ni: "o musi kepeken toki pona". jan pi nimi sin li pilin e ni: ni la, pu la, nimi sin li pona. taso ona li toki e ni kin: "lipu nimi li jo e nimi ale". ni la, mi la, pu la, nimi sin li ike. (mi la, nimi sin li pona a. mi toki e pilin pu taso. mi jan pi nasin pu ala. mi nasin pu la, mi kepeken nimi "pu" tawa pali pu taso, tawa lipu ala.) taso jan Sonja li toki e nanpa wan, sama jan pi nimi sin. ni li nasa a tawa mi!